Friday, September 4, 2015

ፓርቲዎቹ የ«አብረን እንስራ» ጥሪው በተግባር ሊገለጽ ይገባል አሉ





 10ኛው የኢህአዴግ ጉባኤ ላይ ገዥው ፓርቲ ያስተላለፈው ከተፎካካሪ ፓርቲዎች ጋር «አብረን እንሰራለን» መልዕክት ከቃል ባለፈ በተግባር ሊታይ እንደሚገባ ተፎካካሪ ፓርቲዎች ገለጹ።
የአንድነት ለፍትህና ዴሞክራሲ (አንድነት) ፓርቲ ሊቀመንበር አቶ ትዕግስቱ አወል ለጋዜጣው ሪፖርተር እንደተናገሩት፤ ገዥው ፓርቲ «አብረን እንሰራለን» ማለቱ ምንም አዲስ ነገር የለውም። ሆኖም ቃልን ወደ ተግባር መቀየር እጅግ አስፈላጊ ነው። በተግባር መተርጎም ካልተቻለ ሃሳቡ ከአቋም መግለጫነት አይዘልም።
 
እንደ አቶ ትዕግስቱ ገለጻ፤ የቀረበውን ሃሳብ በመተግበር ለአገር ልማትና ዕድገት በጋራ ለመቆም በተለይም ተፎካካሪ ፓርቲዎች ሊወያዩበት የሚገባ መድረክ መፍጠር ያስፈልጋል። ገዥው ፓርቲም ከልቡ አብሮ የመስራት ፍላጎት ካለው መጀመሪያ ማመቻቸት ያለበት ይህንን ነው።
የሰማያዊ ፓርቲ ሊቀ መንበር ኢንጂነር ይልቃል ጌትነት በበኩላቸው፤ «ፓርቲዎች በህግ ተመዝግበው ህጋዊና ሰላማዊ መንገድን ከተከተሉ አብረን እንሰራለን ማለት ፍቺ የሌለው እንቆቅልሽ ነው» ብለዋል። ፓርቲዎች ህጋዊ ካልሆኑ መጀመሪያውኑ ስለ እነርሱ መታሰብ የለበትም፤ ሆኖም ይህ አባባል የሚያሳየው ገዢው ፓርቲ ከልቡ አብሮ ለመስራት ፍቃደኛ አለመሆኑን ነው።
«ተቀራርቦ ለመስራት ፓርቲው አምባገነናዊ አስተሳሰቡን ማስወገድ አለበት፤ ተቃዋሚ ፓርቲ ስለተሆነ ብቻ ከህግ ውጪ ነው ማለትም አግባብ አይደለም፤ በመሆኑም ተቃዋሚን እንደ ጠላት ከመፈረጅ ተላቅቆና ተቀራርቦ ለመስራት ከልብ ቢነሳ መልካም ነው» ብለዋል።
ተፎካካሪ ፓርቲዎች ለአገር የሚጠቅሙ፣ አማራጭ ሃሳብን የሚያመነጩ፣ አገር ለመምራት የሚወዳደሩ፣ የሚደግፋቸው ህዝብ ያላቸው ናቸው ብሎ ማመን እንደሚያስፈልግ አብራርተዋል።
የመላው ኢትዮጵያውያን ብሔራዊ ንቅናቄ (መኢብን ) ፕሬዚዳንት አቶ መሳፍንት ሺፈራው እንዳሉትም፤ ገዢው ፓርቲ አብረን እንሰራለን ማለቱ አዲስ ሃሳብ አይደለም፤ ሆኖም መናገር ብቻ ሳይሆን ለተግባራዊ ስራም ምቹ ሁኔታን መፍጠር የግድ እንደሚል አመልክተዋል።
እንደ አቶ መሳፍንት ገለጻ፤ ፓርቲዎች ለአገርና ለህዝብ ጥቅም ሲባል ተቀራርበው መስራታቸው የሚደገፍ ነው መኢብንም ለእዚህ ዝግጁ ነው።
የኢትዮጵያ ፌዴራላዊ ዴሞክራሲያዊ አንድነት መድረክ ምክትል ሊቀመንበርና ህዝብ ግንኙነት ኃላፊ አቶ ጥላሁን እንዳሻው በበኩላቸው፤ «አብረን እንሰራለን» የሚለው ቃል ሁሌም የሚባል ነው፤ ሆኖም አንድም ቀን ወደ ስራ ተተርጉሞ አያውቅም ሲሉ ተናግረዋል።
«ሰላማዊና ህጋዊ በሆነ መንገድ የምንንቀሳቀስ ፓርቲዎች ብንሆንም፤ ገዥው ፓርቲ አብሮ ለመስራት ቀርቶ በአገሪቱ ጉዳይ ላይ ለመወያየትና ለመነጋገር እንኳን ፍቃደኝነቱ የለውም» በማለት ተናግረው፤ በመሆኑም «አብረን እንሰራለን» የሚለው ሃሳብ በተግባር ተቀይሮ እንደማያውቅ አስታውሰዋል።
«መድረክ እንደ ፓርቲ በሰላማዊ የትግል መስክ ላይ ከገዥው ፓርቲ ጋር አብሮ ለመስራት ተደጋጋሚ ጥያቄን ሲያነሳ ቆይቷል። አሁንም ቢሆን ፓርቲው ከሰላማዊ ትግል ውጪ የሚከተለው አማራጭ የለም» ሲሉም አክለዋል። source ( Ethiopia Prosperous)

0 comments:

Post a Comment