Friday, September 25, 2015

የአቡነ ጴጥሮስ ሀውልት በቅርቡ ወደ ቀድሞ ስፍራው እንደሚመለስ ተገለፀ ::




በአዲስ አበባ የአቡነ ጴጥሮስ ሀውልት የሚያርፍበት አደባባይ ዲዛይን ዝግጅት የመጨረሻ ምእራፍ ላይ የደረሰ በመሆኑ ግንባታ ተካሂዶ ሀውልቱ በአጭር ጊዜ ውስጥ ወደ ቀድሞ ስፍራው እንደሚመለስ የፌደራል የቅርስ ጥናትና ጥበቃ ባለሥልጣን ዋና ዳይሬክተር አቶ ዮናስ ደስታ ገለፁ።
አቶ ዮናስ ለፋና ብሮድካስቲንግ ኮርፖሬት እንደተናገሩት፥ ሀውልቱ የሚያርፍበት አደባባይ ገፅታ እና ይዘት ምን መምሰል አለበት ለሚለው የመጨረሻ መልስ ለመስጠት የቀላል ባቡሩ ስራ የሚጀምርበት ጊዜ ሲጠበቅ ቆይቷል።
ይህም ያስፈለገው ባቡሩ በሚንቀሳቀስበት ወቅት የሚፈጠረውን ንዝረት አጥንቶ የአደባባዩን ዲዛይን ማጠናቀቅ ስላስፈለገ ነው ብለዋል።
አደባባዩ ሊኖር የሚችለውን ንዝረት በተግባር ተፈትሾ መገንባቱ ወደፊት ሀውልቱ ምንም ዓይነት ጉዳት እንዳይደርስበት ያደርጋልም ነው ያሉት።
ባለፈው እሁድ ቀደም ሲል ሀውልቱ የነበረበትን ስፍራ የሚያካልለው የሰሜን-ደቡብ የአዲስ አበባ የቀላል ባቡር መስመር አገልግሎት በመጀመሩ የንዝረት መጠኑን በተመለከተ መረጃዎች እየተሰበሰቡ መሆናቸውን አቶ ዮናስ አስረድተዋል።
መረጃ የመሰብሰቡ ስራ እንዳበቃም የአደባባይ ዲዛይኑ ተጠናቆ ወደ ግንባታ ይገባል፤ ከዚያም ሀውልቱ በቀድሞ ስፍራው ይተከላል ብለዋል።
ለአዲስ አበባ ቀላል ባቡር ፕሮጀክት ግንባታ ሲባል 2005 ዓመተ ምህረት ሚያዚያ ወር ላይ የአቡነ ጴጥሮስ ሀውልት ከቆመበት ተነቅሎ በብሔራዊ ሙዚየም በክብር እንደሚገኝ ይታወቃል።
Source (ኤፍ..ሲ)

0 comments:

Post a Comment