Tuesday, September 30, 2014

ብሄራዊ ባንክን ከ95 ሚሊዮን ብር በላይ ያጭበረበረው ግለሰብ አስማረ አያሌው ተያዘ:










ቁርጥራጭ ብረቶችን ወርቅ ነው ብሎ $ 95,553,413.89 ብር ከብሄራዊ ባንክ አጭበርብሮ ወስዷል ተብሎ 25ዓመት ጽኑ እስራት እና 180 ብር የተፈረደበት አቶ አስማረ አያሌው ደስታ በትላንትናው ዕለት ከተባበሩት አረብ ኤምሬትስ ለኢትዮጵያ መንግስት ተላልፎ ተሰጠ:: በትላንትናው ዕለት ማታ በፌዴራል ፖሊስ እና በኢትዮጵያ የኢንተር ፖል ተወካይ ታጅቦ አዲስ አበባ ቦሌ ኢንተርናሺናል አየር ማረፊያ የደረሰው አቶ አስማረ  አያሌው ቀለል ያለ ነጭ ቲሸርት ያደረገ ሲሆን ሁለቱ እጆቹ በካቴና ቢታሰሩም ከፊቱ ግን ፈገግታ ይታይ ነበር፡፡ የኢትዮጵያ የኢንተር ፖል ተወካይ የሆኑት ኮሎኔል የማነ ሰለጉዳዩ እንደተናገሩት አቶ አስማረ አያሌው ከታህሳስ 1998. እስከ መጋቢት 1999. ባሉት ጊዜያት ከንግድና ኢንዱስተሪ ሚኒሰቴር ሀሰተኛ የሆነ የላኪና አሰመጪ ፍቃድ በማዘጋጀት እንዲሁም ከማዕድንና ኢኒርጂ ሚኒስቴር ሀሰተኛ የሆነ የወርቅ ጥራት ማረጋገጫ በመያዝ ለኢትዮጵያ ብሔራዊ ባንክ በውስጣቸው ቁርጥራጭ ብረታብረት የያዙ 29 የታሸጉ ሳጥኖች በማቅረብ ብሄራዊ ባንክን $ 95,553,413.89/100 ብር/ ዘጠና አምስት ሚሊየን አምስት መቶ ሃምሳ ሶስት ሺህ አራት መቶ አስራ ሶስት ብር ከሰማኒያ ዘጠኝ ሳንቲም/ በውቅቱ የዶላር ምንዛሬ ደግሞ $ 9,555,341/ዘጠኝ ሚሊየን አምስት መቶ ሃምሳ አምስት ሶስት መቶ አርባ አንድ የአሜሪካን ዶላር አጭበርብሯል ብለዋል፡፡ አቶ አሰማረ ድርጊቱን መፈጸሙ ሲደረስበት በኬኒያ በኩል ከሀገር እንደወጣና ለሰባት ዓመታትም መኖሪያውን በተባበሩት አረብ ኤምሬትስ አድርጓ እንደቆየ ታውቋል፡፡
አቶ አስማረ ፈጽሞታል በተባለው በማጭበርበር ድርጊት ክስ ተመስርቶበት ባለመቅረቡ እርሱ በሌለበት ክሱ እንደተሰማና ፍርድ ቤቱም ጥፋተኛ ብሎት 25 ዓመት ጽኑ እስራት እና 180 ብር ቅጣት አሰተላልፎበት እንደነበር ተገልጿል፡፡
ግለሰቡ በትላንትናው እለት በቁጥጥ ስር ውሎ በኢትዮጵያ ፌዴራል ፖሊስ ኮሚሽንና በተባበሩት አረብ ኤምሬትስ ፖሊስ ኮሚሽን በብሔራዊ ኢንተር ፖሎቻቸው አማካኝነት እርክብክብ ተደርጓል፡፡ የኢትዮጲያ ብሔራዊ የመረጃ ደህንነት እና የኢትዮጵያ ፌዴራል ፖሊስ ኮሚሽን የጋራ ግብረ ሀይለ ከኢንተር ፖል ጋር በመተባበር ባለፉት ጥቂት ወራት ተጠርጣሪዎችን ከተለያዩ ሀገራት የያዘ ሲሆን በቅርቡም የግንቦት 7 ጸሀፊ የነበሩት አቶ አንዳርጋቸውን ጽጌን ከየመነ ሰነዓ እንዲሁም አቶ ሳሙኤል ሚኬኤልን ከኬንያ ናይሮቢ ይዞ ማምጣቱ ይታወሳል፡፡  Source  ( Addis News )

0 comments:

Post a Comment