Wednesday, January 5, 2011

ዶክተር ሻውል ሀይሉ የኢንጂነር ሀይሉ ሻውል ልጅ መኪና ገጫቸው::

የመላው ኢትዮጵያ አንድነት ድርጅት ሊቀመንበር ኢንጂነር ኃይሉ ሻውል የመጀመሪያ ልጅ ዶ/ር ሻውል ኃይሉ ትናንትና ረፋዱ ላይ ከፍተኛ የመኪና አደጋ ደረሰባቸው፡፡ ዶ/ር ሻውል አደጋው የደረሰባቸው በቅሎ ቤት አካባቢ የሚገኘው ዳሸን ባንክ ፊት ለፊት መኪናቸውን አቁመው ወደ ባንኩ ለመግባት ከመኪናቸው ሊወርዱ ሲሉ፣ ከመሿለኪያ ወደ ሳሪስ የሚጓዝ አውቶቡስ ገጭቷቸው መሆኑን አባታቸው ኢንጂነር ኃይሉ ሻውል ለሪፖርተር ገልጸዋል፡፡ አደጋውን ያደረሰባቸው አውቶቡስ የከተማ ይሁን የክፍለ ሀገር ለጊዜው መረጃው እንደሌላቸው የገለጹት ኢንጂነር ኃይሉ፣ በልጃቸው ላይ አደጋው እንደደረሰባቸው፣ አምቡላንስ ይዛ የምታልፍ አንዲት ሐኪም በማየቷ በፍጥነት ሆስፒታል እንዲደርሱ በማድረጓ ሕይወታቸው ሊተርፍ መቻሉን ተናግረዋል፡፡ ዶ/ር ሻውል አደጋው ከደረሰባቸው በኋላ ሲኤምሲ አካባቢ በሚገኘው ቅዱስ ያሬድ ሆስፒታል ሕክምና እየተከታተሉ መሆኑን ኢንጂነር ኃይሉ ተናግረዋል፡፡ በደረሰባቸው አደጋ በግራ በኩል ከአንገታቸው ሥር ያለ አጥንት መሰበሩንና ደረታቸው አካባቢ የመቀጥቀጥ ጉዳት እንደደረሰባቸው የተናገሩት አባታቸው፣ ሐኪሞቹ የሚሰጡትን ውጤት እየተጠባበቁ መሆኑን ገልጸው፣ ወደ ውጭ ሄደው መታከም ካለባቸው ወስደው ለማሳከም በመጠባበቅ ላይ መሆናቸውን ገልጸዋል፡፡ ኢንጂነር ኃይሉ ስድስት ልጆች እንዳሏቸውና ዶ/ር ሻውል የመጀመሪያ ልጃቸው መሆናቸውን ገልጸው፣ ከአሜሪካ የዶክትሬት ዲግሪያቸውን ካገኙ በኋላ አንድ ዩኒቨርሲቲ ውስጥ በማስተማርና በተለያዩ ሥራዎች ለ25 ዓመታት መቆየታቸውን ተናግረዋል፡፡ ዶ/ር ሻውል ወደ ኢትዮጵያ እንደመጡ ‹‹ሻውል ኮንሰልቲንግ›› በመባል በአባታቸው በተቋቋመው የአማካሪ ድርጅት ውስጥ መሥራታቸውን፣ ብስራተ ገብርኤል አካባቢ ሳምሶን ኩባንያ (ላፍቶ ሴንተር) የሚባልን ድርጅት ከዳሸን ባንክ ብድር በመውሰድ አቋቁመው ዋና ሥራ አስኪያጅ በመሆን እየሠሩ መሆናቸውን ኢንጂነር ኃይሉ ተናግረዋል፡፡ ምንጭ ( ሪፖርተር)

0 comments:

Post a Comment